87% van munisipale drinkwater is veilig vir menslike gebruik.
Dít volgens AfriForum se onafhanklike blou-en-groendruppelverslag, wat jaarliks bekend gestel word. AfriForum meen die organisasie waarsku egter dat Suid-Afrikaners nie hieroor verlig moet wees nie, aangesien vanjaar se groendruppeluitslae daarop dui dat slegs 13% van verwerkte rioolwater aan die minimum standaarde vir storting in ’n waterhulpbron voldoen.
AfriForum se raadgewer van omgewingsake, Marais de Vaal, sê die organisasie se blou-en-groendruppelverslag bevat die uitslae van waterkwaliteitmonsters wat AfriForum se netwerk van 160 takke landwyd gedurende Augustus van munisipale drinkwater (bloudruppel) sowel as die uitvloei van verwerkte rioolwater (groendruppel) vanuit plaaslike rioolsuiweringsaanlegte geneem het.
Vanjaar se toetse het die teenwoordigheid of afwesigheid van verskeie chemiese en bakteriologiese komponente ondersoek.
Die toetse bepaal onder meer die teenwoordigheid van die bakterie E. Coli, wat diarree, naarheid, braking en selfs nierversaking tot gevolg kan hê, en fekale kolivorme bakterieë, wat siektes soos ingewandkoors (oftewel buiktifus), lewerontsteking en disenterie kan veroorsaak.
Die 2024-bloudruppeluitslae in ’n neutedop:
- Toetse gedoen op: Munisipale drinkwater
- Aantal dorpe/stede getoets: 210
- Nasionale uitslag: 87% van drinkwater is veilig vir menslike gebruik
Van die dorpe wat se water as onveilig vir menslike gebruik beskou word, is Vryheid in KwaZulu-Natal, Amersfoort en Balfour in Mpumalanga, Coligny in Noordwes, De Aar, Hartswater en Kimberley in die Noord-Kaap, Cradock in die Oos-Kaap, Mosselbaai in die Wes-Kaap, en Bethlehem en Welkom in die Vrystaat.
Die 2024-groendruppeluitslae in ’n neutedop:
- Toetse gedoen op: Verwerkte rioolwater by rioolsuiweringsaanlegte
- Aantal rioolsuiweringsaanlegte getoets: 150
- Nasionale uitslag: 13% voldoen aan minimum standaarde.
Vanjaar se groendruppeluitslae, wat ’n aanduiding gee of riool tot ’n voldoende standaard verwerk word om veilig in die omgewing vrygestel te word is, volgens De Vaal, eweneens skokkend. AfriForum het vanjaar die uitvloei van 150 rioolsuiweringsaanlegte getoets. Slegs 13% hiervan (20 uit 150 toetse) het in 2024 aan die minimum standaarde vir storting in ’n waterhulpbron voldoen.
De Vaal sê die uitvloei van die oorgrote meerderheid rioolsuiweringsaanlegte (87%, oftewel 130 uit 150 toetse) voldoen nie aan die voorgeskrewe standaarde nie.
’n Onrusbarende waarneming is dat die uitslae van 2023 se groendruppeltoetse aangedui het dat geen verwerkte rioolwater in die Vrystaat of die Oos-Kaap aan die voorgeskrewe standaarde voldoen het nie. In 2024 is ’n verdere drie provinsies (naamlik Limpopo, Mpumalanga en KwaZulu-Natal) by dié lys gevoeg.
“AfriForum se 2024-blou-en-groendruppelresultate skets ’n donker en kommerwekkende prentjie van die bestuur van Suid-Afrika se watervoorsiening- en rioolsuiweringstelsels,” sê De Vaal.
AfriForum se bestuurder vir Omgewingsake, Lambert de Klerk waarsku, dat die regering nie alleen kan vertrou word om die waterkrisis op te los nie.
