18 November 2024
Die burgerregteorganisasie, AfriForum het sy regspan opdrag gegee om vir ’n saak voor te berei om te sorg dat vanjaar se matriekuitslae wél op mediaplatforms gepubliseer mag word.
Die inligtingsreguleerder het onlangs aangekondig dat hy die openbare bekendmaking van die uitslae verbied het.
AfriForum se hoof van Kultuursake, Alana Bailey meen dit is in openbare belang dat hierdie inligting op openbare platforms gedeel word.
Sy sê om die publisering daarvan as ‘n skending van individue se reg op privaatheid te bestempel, maak nie sin nie, aangesien slegs eksamennommers in die media verskyn.
