Die departement van binnelandse sake gaan hierdie naweek landwyd langer ure werk om die Kiesersregistrasienaweek van die Verkiesingskommissie te ondersteun.
Alle kantore sal Saterdag en Sondag van 08:00 tot 17:00 oop wees, en burgers word aangemoedig om aansoek te doen vir ’n slim-ID-kaart of hul kaarte wat reeds gereed is, af te haal.
Meer as 370 000 ID-kaarte wag tans om landwyd afgehandel te word.
Die departement sê die inisiatief is deel van pogings om toegang tot dienste te verbeter en te verseker dat alle stemgeregtigde Suid-Afrikaners hul demokratiese reg kan uitoefen.
Die minister van binnelandse sake sê die naweek bied ’n belangrike geleentheid vir burgers om seker te maak hulle is gereed om te registreer en aan die komende verkiesings deel te neem.
