Die leier van die National Coloured Congress, Fadiel Adams, is vanmiddag deur die taakspan teen politieke moorde in hegtenis geneem.
Dit volg nadat ’n J50-lasbrief vir sy inhegtenisname uitgereik is weens aanklagte van bedrog en dwarsboming van die gereg.
Hy het na bewering ingemeng by ondersoeke na die moord op die voormalige leier van die ANC Jeugliga, Sindiso Magaqa.
Volgens die nasionale polisiewoordvoerder, brigadier Athlenda Mathe, het Adams versuim om by ’n polisiestasie in Kaapstad aan te meld soos voorheen met sy regspan ooreengekom is.
Hoewel die polisie reeds verskeie persele deursoek het, ontken Adams enige oortreding en beweer dat hy geteiken word omdat hy korrupsie ontbloot. Hy sou na verwagting homself môre aan die polisie oorhandig het.
