Ellen Diedericks
ActionSA het onthul dat dosyne individue en maatskappye wat by Staatskaping en die verskaffing van persoonlike beskermende toerusting betrek is, steeds nie op ‘n swartlys geplaas is nie en dus vry is om sake met die regering te doen.
Die Direktoraat vir Prioriteitsmisdaadondersoeke, die Valke, het aanbeveel dat 509 individue en maatskappye op die Tesourie se swartlys geplaas word. Slegs 18 is egter op die lys van sogenaamde Verbode Voorsieners geplaas. Dié inligting is deur die minister van finansies in antwoord op ‘n geskrewe vraag van ActionSA bekend gemaak.
Die berugte Digital Vibes, wat beweerde bande met die voormalige minister van gesondheid, dr. Zweli Mkhize het, en kontrakte ter waarde van sowat R150-miljoen van die departement van gesondheid ontvang het is óók nog vry om sake met die regering te doen. Dié skandaal het tot Mkhize se bedanking gelei.
Nie een van die 207 voorsieners wat by die R2-miljard se plundering by die Tembisa-hospitaalskandaal betrokke was is op die swartlys nie.
