Solidariteit gaan op 18 November die Johannesburg-metropolisie op ʼn dringende basis in dié stad se hooggeregshof daag nadat sy banier onregmatig verwyder is.
Die vakbond sê hofstukke is onder meer aan die premier van Gauteng, Panyaza Lesufi, en die Johannesburg-metro beteken.
Die banier het die boodskap gedra: “Welcome to the most race-regulated country in the world” en het deel gevorm van ʼn bewusmakingsveldtog oor raswette wat Solidariteit spesifiek vir November 2025 en die G20-beraad beplan het.
Volgens Solidariteit het hulle deur middel van ʼn erkende agentskap gewerk en alle gelde vooruit betaal ten einde te verseker dat die banier behoorlik ontwerp en vertoon word.
Die banier is egter sonder enige kennisgewing, verduideliking of regmatige proses op 10 November deur stadsowerhede verwyder.
Solidariteit voer in die dringende aansoek aan dat die stadsraad se optrede onwettig en polities gemotiveerd was en dat die metro se eie munisipale verordeninge nie aan amptenare die mag gee om advertensies eensydig te verwyder nie.
Die bestuurshoof van Solidariteit, dr. Dirk Hermann, sê die banier se doel was om ʼn spieël vir die wêreld op te hou van Suid-Afrika se rasbeleid, maar het nou ook ʼn spieël geword van ʼn regering wat die reg in eie hande neem en wat vryheid van spraak ondermyn.
Solidariteit vra dat die verwydering van die banier onwettig verklaar word en dat die hof die onmiddellike herstel van die banier op dieselfde plek moet gelas, of dat die banier kosteloos aan Solidariteit terugbesorg word.
Die vakbond sê hy gaan intussen voort om soortgelyke advertensieborde regoor die provinsie op te rig.
2 Responses
Teen die tyd dat die gekaapte regstelsel uit spraak lewer is die G20 verby . . . . . .die korrupte ANC en hul kaders gaan dit vetraag . . . . . .
Die waarheid maak seer…Lesufi moet van diefstal en beskadiging van goedere wat nie aan hom behoort nie ook aangekla word.