Die Solidariteit-skoleondersteuningsentrum (SOS) eis ’n ondersoek na die kontrak wat die Noordwes-onderwysdepartement aan die Lebone Altron DSV-konsortium toegeken het wat hom vir vyf jaar elke jaar R128 miljoen in die sak sal bring om matriekvraestelle te druk.
Dis bykans vier keer meer as die R27 miljoen wat die departement tans betaal.
Melanie Buys, die hoof van Ontwikkeling by die SOS sê die drukkoste het tot dusver R690 per kandidaat beloop, maar sal met die nuwe kontrakteur R3 100 per leerling kos.
“Die drukkoste van eindeksamenvraestelle beloop dus meer as tien keer die totale jaarlikse toewysing per leerder wat skole van die staat ontvang om die hele jaar se leermateriaal, leerderondersteuning en instandhouding van ’n openbare skool te betaal.”
Buys is van die standpunt dat dié onderwysdepartement en die ANC-regering nie die beste belang van die volgende geslag leerlinge op die hart dra nie. Sy sê die SOS eis ’n indringende ondersoek en daadwerklike optrede deur die minister van basiese onderwys.
