9 Februarie 2025
Die Suid-Afrikaanse Polisiediens sê hy stel ondersoek in na beweerde voorkeurbehandeling van die diamant-handelaar, Louis Liebenberg, terwyl hy nog in polisieaanhouding is.
DIT kom nadat videos en foto’s, vroeër vandeesweek tydens ‘n hofverskyning deur die media versprei is, waarin gesien kan word hoe Liebenberg sy vrou, Dezzi soen en omhels. Fisieke kontak word nie toegelaat word nie.
Volgens die polisie stel hulle ook ondersoek in of die nodige maatreëls gevolg is, en Dezzi se sak deursoek is vir enigiets wat nie toelaatbaar is nie.
Die egpaar het Dinsdag in die hof verskyn op aanklagte van korrupsie. Louis het aangedui dat hy weer om borg wil aansoek doen nadat hy vroeër sy borgtogaansoek laat vaar het. Sewe ander mense staan saam met hulle tereg.
Intussen het die polisie ook in die verklaring gesê hy is bekommerd oor die foto’s wat van die beskuldigdes geneem is omdat dit volgens hulle “teen die Wet op die Beskerming van Persoonlike Inligting (Popia) indruis.”
Maroela Media berig egter dat die hof aan die media toestemming gegee het om hulle af te neem.
Foto: Polisie
