Die Suid-Afrikaanse Polisiediens het ’n reusedeurbraak gemaak toe speurders van die narkotika-eenheid op ’n pakhuis in Derdepoort, Pretoria toegeslaan en beslag gelê het op skedulemedisyne en steroïedes ter waarde van R15 miljoen.
Dít volg nadat die polisie verlede maand ’n slag geslaan het toe ’n dwelmsindikaat oopgevlek en ses verdagtes vasgetrek het.
Verdere ondersoeke het speurders na die pakhuis gelei waar ’n verskeidenheid opkikkers, stimulante en skedulemedisyne gevind is.
Volgens voorlopige bevindings het die sindikaat van ’n aanlyn platform gebruik gemaak om hierdie middels te vervaardig en te versprei.
Aanklagte teen twee van die verdagtes is vir eers teruggetrek.
Die polisie sê hierdie deurbraak is ’n belangrike stap in die stryd teen onwettige dwelmhandel in die land.
In nóg ’n klopjag het die Wes-Randse blitspatrollie op ’n Mandrax-laboratorium in Westonaria afgekom en twee mense in hegtenis geneem.
Masjinerie wat gebruik is om die dwelmmiddel te vervaardig asook poeier van sowat 35 000 pille, is ook gevind.
