6 Februarie 2025
‘n Boer van Mpumalanga is in hegtenis geneem nadat hy glo vrot kos, wat reeds die vervaldatum bereik het, herverpak en weer verkoop het.
Die Valke se eenheid in Secunda het saam met die polisiediens gewerk en sê hulle het inligting ontvang oor die 30-jarige boer se werksaamhede.
Volgens die Valke laai die boer glo die kos by kettingwinkels en ander verspreiders op en maak of hy dit vir sy diere wil voer.
Die Valke en inspekteurs van die Govan Mbeki-plaaslike munisipaliteit se gesondheidsdepartement het twee pakhuise gevind waarin die bedorwe kos geberg is. Vier koelkamers met blikkieskos, wat reeds verval het, vrot rooi vleis, en hoender is gevind.
Sowat 1000 kratte is ook gevind vol vrot suiwelprodukte, wat kaas insluit. Sewe vrieskaste met herverpakte graan, meel en mieliemeel is ook in die stoorkamer gevind.
Die Valke se hoof in Mpumalanga, generaal-majoor Nico Gerber, sê die produkte was vir niksvermoedende verbruikers bestem en hou ‘n groot risiko vir gemeenskappe in.
