Die konstitusionele hof het beslis dat direktiewe van die Suid-Afrikaanse Menseregtekommissie, die SAMRK, nie wetlik bindend is nie.
Dié uitspraak vloei voort uit ’n saak tussen die SAMRK en AgroData, ná ’n bevinding van die SAMRK dat grondbesetters op die plaas De Doorn Hoek – wat in besit van AgroData is – gratis toegang tot boorgatwater moet kry.
Die uitspraak steun vroeëre uitsprake deur die hooggeregshof in Mpumalanga en die Hoogste Hof van Appèl wat bevind het dat die kommissie se bevindings slegs afdwingbaar is wanneer dit deur ’n hofbevel bekragtig is.
Die konstitusionelehofuitspraak bepaal dat dit die SAMRK se mandaat is om regstellende stappe te fasiliteer, eerder as om dit af te dwing.
Die burgerregtegroep AfriForum – wat as vriend van die hof opgetree het – verwelkom die uitspraak en bestempel dit as ’n oorwinning vir gebalanseerde magsdeling in ’n grondwetlike bestel.
