Marelize Maré
Die DA se federale regskommissie sê hy ondersoek die openbare dispuut tussen die party se leier, John Steenhuisen en die federale finansiële voorsitter, dr. Dion George.
Dít volg ná berigte oor Steenhuisen se kredietkaartuitgawes en ‘n onderonsie tussen die lede.
Die DA se nasionale woordvoerder, Karabo Kaukau, het aan die media gesê die regskommissie sal die kwessie ondersoek wat in die media die rondte doen.
Die kommissie het ook beveel dat die aangeleentheid nie verder in die openbaar bespreek sal word, terwyl ondersoeke aan die gang is nie.
Die politieke ontleder verbonde aan die Noordwes-Universiteit, prof. André Duvenhage, sê daar blyk reeds aanduidings van magsvorming en magsgroeperinge in die DA te wees.
Hy sê daar word ’n sterk beroep op die party gedoen om nie na buite te praat nie, aangesien dit die party se beeld ernstig kan benadeel.
Prof. Duvenhage meen die DA is bekend as ’n party met baie hoë integriteit, streng dissipline, konsekwentheid en die sistematiese en eenvormige toepassing daarvan en daarom is die probleme in die party nie met dié in die ANC vergelykbaar nie.
Hy meen indien die party nie die konflik op ’n konsekwente wyse hanteer nie, kan dit die party verswak.
Die DA hou in April aanstaande jaar sy leierskapskonferensie en volgens prof. Duvenhage sal dit bepalend wees van watter leierskapskuiwe en verandering in die party kan plaasvind.
Fotokrediet: Phill Magakoe/Getty Images
