Checkers afleweringsakke “skop stof in die oë” van Versace, Louis Vuitton en Givenchy

Net wanneer jy dink dat jy alles gesien het, wys twee jong mense jou hoe gewone bruin afleweringsakke van Checkers Sixty 60 in hoogmode verander kan word.

Deelnemers aan die die Hoër Landbouskool Boland se onlangse Meneer en Mejuffrou Boland-kompetisie is gevra om modestukke uit herwinbare material te maak.

Daar was kreatiewe uitrustings gemaak van hondekossakke, plastieksakke en koerantpapier.

Dit is egter die 17-jarige matriekleerling, Beate van Wyk en haar kêrel, Jacques Brand wie se Checkers-uitrustings die kollig gesteel het.

Jacques se ma, Hesmari van Deventer het honderde sakke van die winkelgroep se Sixty 60-afleweringsdiens gebruik gemaak om ‘n aandrok vir Beate te maak, kompleet met korset, en frilletjies van Checkers-plastieksakke.

Vir haar seun het sy ‘n volledige pak klere gemaak met deftige afwerkings. Dit het haar slegs vier dae geneem. Beate en Jacques is tydens die kompetisie aangewys as Meneer en Mejuffrou kreatief.