24 Maart 2022
Die bekroonde skrywer van verskeie Afrikaanse jeugboeke, Derick van der Walt, is vanoggend in die ouderdom van 63 oorlede.
Hy is in Julie 1958 in Virginia in die Vrystaat gebore, maar het in Johannesburg grootgeword. Die gesin het aan die begin van sy hoërskooljare Pretoria toe getrek waar hy matriek aan die Afrikaanse Hoër Seunskool voltooi het.
Van der Walt het ‘n honneursgraad in kommunikasiekunde en ‘n meestersgraad in kreatiewe skryfkuns aan Tukkies voltooi.
Volgens NB-Uitgewers het hy sowat twee weke gelede geval en kopbeserings opgedoen.
Van sy bekendste boeke is Lien se Lankstaanskoene (2008), waarvoor hy ‘n Sanlam- en MER-prys ontvang het. Dié boek is ook in ‘n rolprent verwerk. In 2010 skryf hy Willem Poprok waarvoor hy ook ‘n Sanlam- en MER-prys, sowel as die Scheepersprys vir Jeuglektuur ontvang het.
Sy eerste boek vir volwasse lesers, Daan Dreyer se blou geranium, het in 2012 verskyn.
Van der Walt se laaste boek, Toring van Jasmyn het in 2019 vir hom ‘n Sanlam prys vir jeugliteratuur besorg.
