Deur: Johnell Prinsloo
Ek lees verlede week dat Wiskunde as vak by 464 openbare skole in Suid-Afrika ontbreek. Dit is natuurlik net by hoërskole en vanaf gr 10 wanneer leerders vakkeuses kan uitoefen. Verder moet ons natuurlik ook verstaan dat dit nie beteken dat ander wiskundige vakke soos Wiskunde Geletterdheid, nie by die betrokke skool aangebied word nie.
Bogenoemde moet die aanvanklike skok egter nie absorbeer nie.
Terwyl baie van ons met koue rillings terug dink aan die Wiskundeklas of daardie oomblikke net voor die eksamenpunte uitgelees is en ons steeds graag grappies maak oor parralellogramseisoen wat ons verdiepte meetkundige kennis die moeite werd maak, bly die belangrikheid van Wiskunde vir die ontwikkeling van die brein en die beroepsdeure wat dit vir die toekoms kan oopmaak onbetwisbaar.
Hierdeur ontken ek nie die waarde van ‘n vak soos Wiskunde Geletterdheid nie, ek is egter net oortuig daarvan dat heelwat leerders se vermoë om Wiskunde te verstaan, geniet en daarin te kan presteer negatief deur ‘n hele aantal faktore beïnvloed word en dat dit absoluut tot hul nadeel is.
‘n Aantal skole, soos ons weet, doen ongelooflik baie moeite met hul leerders. Vaslegging van klanke voor daar gelees en geskryf word asook die vaslegging van begrippe en konsepte voor somme gemaak word, word geprioritiseer. Tog kan ons, ten spyte hiervan, nie die impak vir ‘n oorvol kurrikulum, beperkte kontaktyd en druk buitemuurse programme onderskat nie. En dit is net in die skole waar daar genoegsame hulpbronne en gekwalifiseerde en toegewyde onderwysers is. Wanneer ons bogenoemde egter in skole sonder hulpbronne, oorvol klaskamers en afwesige onderwysers gaan waarneem, sal ons sien dat die akademie (en ek wil byvoeg, die dissipline) aan die agterspeen suig.
Volgens my is dit waar onderwys Suid-Afrika se heel grootse probleem lê (saam met al die ander “heel grootste probleme” wat die stelsel ondervind); die grondslag ontbreek. Daar is te min tyd vir vaslegging en die resultate spreek vanself wanneer wiskundige vermoëns of bv. lees met begrip in latere grade getoets word.
Om ‘n afgewaterde blootstelling aan Wiskunde te gee, maak skade. Dit verhoed dat meeste kinders wat wel die potensiaal het, Wiskunde sal kan bemeester en gevolglik lewer sulke laerskole klasse vol leerders wat dié vak doodeenvoudig net nie verstaan nie. Baie vrees dit ook tot so ‘n mate dat die angs hulle lam lê. En dan … dan gaan hierdie leerders hoërskool toe en teen gr 10 is Wiskunde iets van die verlede, saam met die vermoë om oplossingsgedrewe te wees, uitdagings analities en objektief te benader, want dit is die gedeelte van die brein wat Wiskunde ontwikkel, en deursettingsvermoë te kon aanleer. So word ‘n aantal kinders van die vermoë om te kon presteer in hierdie vak, te kon gaan studeer het en dalk bv. ‘n dokter te kon word, ontneem.
Dit is van kardinale belang dat die ingryping moet plaasvind, maar om vir die staat te wag, is beslis nie die antwoord nie. Slegs betrokke ouers en skoolgemeenskappe wat hul verantwoordelikhede t.o.v. die opvoeding van hul kinders ernstig opneem sal werklik ‘n verskil kan maak en ‘n toekoms vir hul kinders kan bou.
