’n Soektogoperasie in die Pretoriuskop-gedeelte van die Krugerwildtuin het tragies geëindig nadat menslike oorskot in die Mesteldam gevind is.
Veldwagters het op 28 Augustus vier mense betrap wat na bewering onwettig met nette visgevang het.
Drie het hulle aan die owerhede oorgegee, maar die vierde het die dam binnegegaan om inhegtenisneming te ontduik.
’n Intensiewe reddingsoperasie is van stapel laat loop, maar die persoon is eers op 31 Augustus opgespoor nadat veldwagters die oorskot in die water gewaar het.
Die oorskot is met die hulp van nooddienste en die Suid-Afrikaanse Polisiediens uit die dam gehaal.
Die polisie lei nou die formele ondersoek en forensiese identifikasie om die oorledene se identiteit vas te stel.
