5 Desember 2024
Kersfees is om die draai, en die meeste mense se kersbome is al opgemaak.
Máár vir diegene wat nog soek na daardie spesiale boom, is daar vanjaar bome op die aanlyn platform, ImportitAll wat jou meer as R600 000 uit die sak sal jaag.
Die handelsmerk, Yaheetech verkoop ‘n wit, kunsmatige kersboom van 2,7 meter hoog met 900 gekleurde liggies, wat reeds aan die boom vas is, en hy sal jou “net” R690 016 kos.
Die reeks se tweede duurste boom is net effens “goedkoper” teen ‘n prys van R682 479, en staan ook 2,7 meter hoog, maar is groen en het net warm, wit liggies.
Vir iets helfde die prys, kan jy R333 463 betaal vir ‘n boom van 2,2 meter hoog.
Dié boom is vir diegene wat opsoek is na ‘n winter-kersfees, omdat die boom versier is met dennebolle en bessies. Dit het ook warm, wit liggies.
Die “goedkoper” boom in die reeks is 1,3 meter hoog met 150 warm, wit liggies en kos R71 303.
Die aanlyn koopplatform, Amazon, se duurste boom is 1,8 meter hoog en lyk of daar sneeu op is, maar het geen liggies of ander versierings nie. Dit sal jou R12 500 kos.
Al hierdie bome is in Suid-Afrika beskikbaar, maar as jy gehoop het om dit reeds vir dié jaar se kersfees op te slaan, sal jy dalk teleurgesteld wees, omdat die bome heel waarskynlik nie betyds vir 25 Desember afgelewer sal word nie. Daar is darem weer volgende jaar.
