15 November 2024
2024 se Mejuffrou Suid-Afrika, Mia le Roux sal nie meer aan die Mejuffrou Heelal-kompetisie deelneem nie.
Volgens ‘n amptelike verklaring deur die Mejuffrou Suid-Afrika-organisasie moes Le Roux as deelnemer onttrek weens kommer oor haar gesondheid. Sy het in Augustus geskiedenis gemaak toe sy die eerste dowe persoon geword het wat dié titel kon verower.
In die verklaring het Le Roux gesê sy is dankbaar aan elke persoon wat haar ondersteun het in die tyd wat sy reeds in Meksiko deurgebring het ter voorbereiding vir die Mejuffrou Heelal-kompetisie, wat Sondag, 17 November, plaasvind.
Sy sê om te onttrek was ‘n baie moeilike besluit omdat sy weet dat mense hulle hoop en drome op haar skouers geplaas het. “Ek is egter baie dankbaar dat ek die geleentheid gegun is om te fokus op my gesondheid en die herstelproses, sodat ek my tyd as Mejuffrou Suid-Afrika kan voortsit.”
Dit is onbekend watter gesondheidsprobleme Le Roux ervaar.
Die Mejuffrou Suid-Afrika-organisasie sê hy is trots op Le Roux se braafheid, en dat haar gesondheid en welstand die belangrikste prioriteit bly.
