24 Januarie 2024
Die 51-jarige eienaar van die Kouga Kliphuis-gastehuis naby Kareedouw in die Oos-Kaap, Kevin Pretorius, het vanoggend in die Gqeberha/ Port Elizabeth-streekhof verskyn waar hy skuldig bevind is op twee aanklagte van moord, nadat ‘n jong, verloofde paartjie in April 2020 in dié gastehuis dood is.
Mari Hoon (28) en Jean Vosloo (25) was saam met ‘n vriend by die gastehuis vir ‘n naweekwegbreek toe hulle liggame op 25 April in die storit gevind is.
Die polisie se toksikologieverslag het hoë vlakke van koolstofmonoksied in Mari en Jean se bloed getoon, waarna die staat aangevoer het ’n foutiewe gasgeiser by die gastehuis het meegebring dat die verloofdes deur koolstofmonoksied vergiftig is.
Die hof het beslis dat hy verantwoordelik was vir die moorde op die paartjie.
Die staatsaanklaer, Johan Jansen, het vroeër tydens sy slotbetoë gesê dat Pretorius ander gaste se waarskuwings oor die stort geïgnoreer het. Die geiser se sensor was ook foutief.
Hy sal later gevonnis word.
