7 Februarie 2025
President Cyril Ramaphosa sê is hy verbind daartoe om voort te gaan met die werk om die Nasionale Gesondheidsversekering (NGV) in te stel.
Dit kom te midde van verwarring tydens gisteraand se Staatsrede oor of daar wysigings gemaak gaan word om die privaat mediese fondse te beskerm, want Ramaphosa het nie enige duidelikheid daaroor gegee nie.
Die implementering van die NGV is steeds ‘n bron van twis tussen die ANC en die DA.
Die minister van gesondheid, dr Aaron Motsoaledi, het gister gesê hy is nie bewus van enige wysigings wat gemaak gaan word in verband met privaat mediese fondse nie.
Die regering beplan om ‘n reuse veldtog vanjaar van stapel te laat loop om anti-retrovirale behandeling aan ‘n bykomende 1,1-miljoen mense te verskaf.
Intussen het lede van die parlementêre komitee oor gesondheid tydens ‘n onlangse inligtingsessie aan Motsoaledi gesê dat Suid-Afrika ’n onafhankliker gesondheidstelsel moet hê en minder op buitelandse geldhulp staatmaak.
Miljoene Suid-Afrikaners met MIV/vigs word geraak nadat die Amerikaanse president, Donald Trump verlede maand beveel het dat sy regering alle finansiering aan buitelandse hulporganisasies vir 90 dae staak waarna die finansiering hersien sal word.
