18 Oktober 2024
Diplomate van Taiwan sê die Suid-Afrikaanse regering probeer konflik uitlok deur te eis dat dié land sy kantoor uit Pretoria skuif, en voer ook aan dat die regering onder druk van China geswig het.
Volgens Taiwanse mediahuise gaan Taipei nie gelate aan dié versoek toegee nie en dreig hy om opvoedkundige uitruilingsooreenkomste op te skort, strenger visumvereistes vir Suid-Afrikaners in te stel en dat hy ook sal eis dat SA sy kantoor in Taiwan uit die hoofstad, Taipei, moet skuif.
Die nuusdiens, die Daily Maverick sê hy het onafhanklik bevestig dat die departement van internasionale betrekkinge en samewerking, Dirco, daarop aangedring het dat Taiwan sy kantoor teen die einde van hierdie maand reeds van Pretoria, waarskynlik na Johannesburg, verskuif.
Soos die meeste lande ter wêreld, erken Suid-Afrika nie amptelik Taiwan as ‘n land apart van China nie.
Dit sedert Suid-Afrika in 1998 diplomatieke erkenning van Taiwan na China oorgeskuif het.
Foto: Google Maps
