Nuuskommentaar: 15 April 2024
Deur: Jaco Kleynhans
Saterdagaand se reeks lugaanvalle deur Iran op Israel is nie bloot net deel van die huidige stryd om die Gasa-strook, of selfs net in reaksie op Israel se beweerde betrokkenheid by ʼn aanval op Iran se konsulaat in Damaskus, Sirië nie. Iran se besluit om 300 missiele en hommeltuie vanaf sy eie grondgebied op Israel af te vuur, is ʼn volgende stap in ʼn dekades lange stryd waarin die ajatollas, wat Iran met ʼn ystervuis regeer, Israel wil uitwis, maar ook ʼn dominante magsrol in die Midde-Ooste wil inneem.
Sedert die Iranse Revolusie in 1979, toe ʼn pro-Westerse en pro-Israel-regering in Iran omver gewerp en deur ʼn fundamentalisties-Islamitiese-regime vervang is, is dit die doel van Iran om Israel uit te wis en om die dominerende rolspeler in die Midde-Ooste te word. Iran is ʼn meerderheid Sjiïtiese-Moslemland en die afgelope vyf dekades voer die regime in Teheran ʼn verbete stryd teen Soenniete-rolspelers soos Saoedi-Arabië.
Iran het egter ook oor die jare heen ʼn indrukwekkende groep organisasies, waarvan talle as terreurgroepe geklassifiseer kan word, in lande soos Irak, Sirië, Jemen en Libanon ontwikkel. Hezbollah in Libanon is die magtigste van hierdie groepe en het na bewering meer as 100 000 vuurpyle wat hulle vanuit die suide van Libanon op Israel kan afvuur sou Iran besluit om ʼn volskaalse oorlog teen Israel te begin.
Vrese dat Iran ʼn kernwapen kan vervaardig het ook die afgelope dekade toegeneem en die vorige Amerikaanse president, Donald Trump, het streng sanksies teen Iran ingestel. President Biden, Amerika se huidige president het egter die sanksies verslap en weer miljarde dollars aan Iran, wat bevries was, beskikbaar gestel. Biden se Iran-beleid het klaaglik misluk.
Iran is vandag nader as ooit tevore om ʼn kernwapen te ontwikkel met die uitsluitlike doel om Israel aan te val. Oor die afgelope twee dekades het Iran die verdeeldheid onder Palestyne en die opkoms van Hamas tot sy eie voordeel benut. Daar is goeie rede om te glo dat senior generaals van Iran direk betrokke was by gesprekke in Beirut, Libanon waar Hamas se aanval op Israel aanvanklik beplan is.
Die afgelope paar maande het Iran se stryd teen Israel, wat ʼn ideologiese en fundamentalistiese geloofsoorlog is, drasties geëskaleer. Die Houthi-rebelle in Jemen, het met die hulp van Iran en Irannese wapens chaos in die Rooisee veroorsaak met hulle aanvalle op kommersiële skepe.
Irannese proksies in Sirië, Irak en Libanon het die afgelope maande verskeie aanvalle op Israel en Amerikaanse teikens uitgevoer. Israel se besluit om op 1 April lede van die Iranse Revolusionêre Wag in ʼn aanval op Iran se konsulaat in Damaskus uit te skakel was ʼn direkte reaksie op Iran se groeiende invloed in Sirië. Die afgelope paar weke is daar talle geloofwaardige berigte oor die toename in wapens uit Iran wat na die Wesoewer gesmokkel word.
Saterdagaand het Amerika, Israel, Jordanië, Frankryk, Brittanje en nog lande saamgewerk om die meeste missiele en hommeltuie af te skiet. In ʼn groter oorlog waar Hezbollah en groepe uit Sirië, Jemen en Irak ook betrokke raak, kan baie leliker gevolge inhou. Daarmee saam kan Amerika in ʼn reuse-oorlog betrek word. Iets wat verhoed kon en moes word. Dit lyk egter toenemend of die tyd om so ‘n oorlog te voorkom uitloop.
Foto: Reuters
