Redaksie
Oliepryse het skerp gedaal na die ondertekening van ’n tydelike vredesooreenkoms tussen die VSA en Iran. Hierdie nuus volg op die dag wat Statistiek Suid-Afrika (SSA) aangekondig het dat die jaarlikse verbruikersinflasie in Mei tot 4,5% gestyg het, teenoor 4% in April.
Dit is die hoogste vlak sedert Julie 2024. Vervoerinflasie, een van die vernaamste gedeeltes van SSA se inflasiemandjie, het in Mei met 9,4% op ’n jaargrondslag gestyg. Dit het 1,3 persentasiepunte tot die oorhoofse inflasiesyfer bygedra.
Die hoofekonoom van die Efficient-groep, Dawie Roodt, sê inflasie is nietemin effens laer as wat verwag is en ten spyte daarvan dat dit oor die volgende paar maande nog kan styg, verwag hy nie dat die Suid-Afrikaanse Reserwebank rentekoerse verder gaan verhoog nie, veral met die olieprys wat dit tans is.
“Die werklike impak van inflasie met die laer olieprys gaan ons eers oor ’n klompie maande voel. Ons sien dus ’n bult in die inflasie oor die volgende klompie maande.”
Roodt sê verder dat dit lyk of die Amerikaners oor die volgende paar maande rentekoerse gaan verhoog, wat weer goed is vir die rand-dollar-wisselkoers.
“Ek sal glad nie verbaas wees as ons die rand onder $16 sien verhandel nie. Ek dink ons gaan ’n paar maande wag, maar hier teen die einde van jaar of volgende jaar kan ons moontlik twee 25-basispuntverlagings in rentekoerse sien. Moontlik drie keer.”
Roodt sê die goeie vooruitsigte is egter verbind met stabiele toestande in die Midde-Ooste.
Lees meer berigte in dié uitgawe van Nuusweek – https://www.pretoriafm.co.za/wp-content/uploads/2026/06/Uitgawe-71-19-25-Jun-2026.pdf
