Voorlopige verslag oor brand by parlement word môre oorhandig

Deur on

12 Mei 2022

Daar behoort teen môre ‘n duideliker prentjie te wees van die skade wat aan die parlementsgebou aangerig is.

Dit het aan die lig gekom tydens hofverrigtinge van die vermeende brandstigter, Zandile Christmas Mafe, nadat ‘n brand in Januarie groot dele van die gebou in puin gelê het.

LEES OOK: FORENSIESE ONDERSOEKERS VERBIND MAFE MET BEELDMATERIAAL TYDENS BRAND BY PARLEMENT

Volgens die staatsaanklaer in dié saak, advokaat Mervyn Menigo, behoort konsultante vandag met die departement van openbare werke en infrastruktuur te vergader waarna ‘n voorlopige verslag môre aan minister, Particia de Lille, oorhandig te word.

‘n Finale verslag behoort ‘n week later beskikbaar te wees.

Tydens Mafe se verskyning vandag het die hof – onder andere – gehoor dat die brandstigtingsverslae nog uitstaande is omdat die staat se deskundige getuie nog nie toegang kon kry tot die ingenieursplanne nie.

LEES OOK: PARLEMENT SE SPRINKELKLEP NIE GEDIENS NIE, LUIDENS ONDERSOEK

Daar is ook nog nie sekerheid of Mafe ook van terrorisme aangekla gaan word nie, aangesien die staat nog – na twee maande – steeds wag op die magtigingsbrief vanaf die direkteur van openbare vervolgings, Shamila Batohi.

Die saak is tot 9 Junie uitgestel.


Current track

Title

Artist