22 November 2023
Die regering van Katar sê die begin van die skietstilstand tussen Israel en Hamas sal binne die volgende 24 uur aangekondig word.
Die vier dag lange skietstaking is deur Katar bemiddel.
Volgens die ooreenkoms sal 50 persone wat deur Hamas militante gyselaar geneem is en in Gasa aangehou word, vrygelaat word.
Palestynse vroue en kinders wat in tronke in Israel aangehou word, sal ook vyrgelaat word, en humanitêre hulp sal die Gasa-strook kan binnegaan.
Die Amerikaanse president, Joe Biden het die ooreenkoms verwelkom, maar sê dit is baie belangrik dat alle aspekte daarvan nagekom moet word.
LEES OOK: RAMAPHOSA WIL HÊ STRAFHOF MOET ISRAEL VIR OORLOGSMISDADE ONDERSOEK
Die Suid-Afrikaanse parlement het intussen gister ‘n mosie deurgevoer, wat ‘n beroep doen op die regering om sy diplomatieke bande met Israel op te skort.
Die VF Plus se doktor Corné Mulder sê die besluit is uiters kortsigtig, nie in belang van Suid-Afrika nie en sal die land toenemend isoleer.
Hy sê dit maak ’n bespotting van die ANC-regering en president Cyril Ramaphosa se sogenaamde pogings om deur gesprekvoering te help om vrede te beding in die voortslepende Midde-Oosterse krisis met een party wat nou onwelkom is in die gesprek.
Die DA sê ook indien die ANC ernstig is om vrede te bewerkstellig, sou hy by die onderhandelingstafel gebly het, en dit nie verlaat nie.
Lees verder
Pretoria FM