Onluste: Skade in KZN op ongeveer R20-miljard beraam

Deur on

20 Julie 2021

Die waarnemende minister in die presidensie, Khumbudzo Ntshavheni sê die regering se belangrikste prioriteit is nou om die ekonomie te herbou en stabiliseer ná die afgelope paar dae se onluste in KwaZulu-Natal en Gauteng.

Volgens haar is die polisie en die weermag steeds op ‘n hoë gereedheidsgrondslag al is daar die afgelope 24 uur géén gevalle van plundery of geweld aangemeld nie.

Ntshavheni sê die polisie se veldtog om gesteelde goedere terug te kry, werp ook vrugte af.

Hofsake

Wat hofsake betref, het meer as 200 verdagtes van plundery tot dusver in Gauteng in die hof verskyn. Van dié persone is reeds op borgtog vrygelaat.

Ntshaveni sê drie verdagtes, wat aanklagte van aanhitsing tot geweld in die gesig staar het ook reeds in die hof verskyn en sal in aanhouding bly totdat hulle om borgtog kan aansoek doen.

“Een verdagte het homself gister in Durban aan die polisie oorhandig. Hy sal môre in die landdroshof verskyn.”

Ekonomie hervat

Sy het verder ook bevestig dat die N2 en N3-snelweë weer soos normaal bedryf word nadat dit sowat 10 dae gelede gesluit moes word. Teen Sondagoggend het nagenoeg 100 vragmotors per uur sleutelpunte op dié paaie verbygesteek.

Volgens Ntshaveni het kettingwinkels in KwaZulu-Natal en Gauteng ook bevestig dat die voorraad van kos en ander produkte ook meestal terug na normaal is.

Meeste van die inkopiesentrums, wat deur plunderaars geteiken is het ook weer hulle deure heropen.

Skade

Volgens haar word die skade aan eiendom in KZN op ongeveer R20-miljard beraam. Dit sluit die skade aan 161 winkelsentrums, 11 pakhuise, agt fabrieke en 161 drankwinkels- en verspreiders in. “‘n Totaal van ongeveer 3000 winkels in dié provinsie is geplunder. Dit sluit 90 apteke in.”

1480 outomatiese banktellers en 300 banke en Poskantore is ook beskadig.

Sy sê dié impak van die onluste gaan nog lank gevoel word. “150 000 poste en werksgeleenthede is in gedrang.” Die skade in Gauteng moet nog bepaal word.

Hou Afrikaans op die lug

Klik hier


Current track

Title

Artist