2 Augustus 2023
Die woordvoerder van die Jacob Zuma-stigting, Mzanele Manyi, sê oud-president Jacob Zuma is terug in die land nadat hy Rusland besoek het vir mediese behandeling.
Dit is nie bekend vir watter mediese toestand Zuma behandeling ontvang het nie.
Manyi sê Zuma beplan om Vrydag (4 Augustus) self in die hooggeregshof in Pietermaritzburg te wees vir die saak waarin hy poog om die staatsaanklaer, advokaat Billy Downer, en die joernalis, Karyn Maughan, privaat te laat vervolg.
Sy vertrek na Rusland kom kort nadat die Grondwethof Zuma se vrylating op mediese parool as onwettig bestempel het. Hy is in 2021 tot 15 maande gevangenisstraf gevonnis oor sy versuim om by die Zondo-kommissie van ondersoek na staatskaping te getuig.
