16 Februarie 2022
Regter Piet Koen het vanoggend oud-president Jacob Zuma se aansoek om verlof tot appél in die Pietermaritzburg hooggeregshof van die hand gewys.
Dit kom na Koen se vroeër beslissing dat die staatsaanklaer in Zuma se korrupsiesaak, advokaat Billy Downer hom nié van die saak gaan onttrek nie. Zuma voer aan dat Downer ‘n botsing van belange het.
Volgens Koen is hy oortuig dat ‘n ander hof nie tot ‘n ander beslissing sou kom nie. Hy sê die argument dat Downer ‘n botsing van belange het is onwaar.
Die korrupsie saak hou verband met die omstrede wapenskandaal. Die Franse wapenvervaardiger, Thales en Zuma staar 16 aanklagte van korrupsie, bedrog, geldwassery en rampokkery in die gesig. Die verhoor moet op 11 April begin.
