11 Julie 2021
Minstens 62 mense is tot dusver in KwaZulu-Natal en Gauteng in hegtenis geneem in verband met geweldadige betogings in dié provinsies.
Die betogings onder die #FreeJacobZuma, wat Vrydagoggend in KwaZulu-Natal uitgebreek het, het vermoedelik ook nou na Gauteng versprei. Foto’s en videos is wyd op sosiale media versprei waarin mense ook nou in Gauteng winkels plunder en voertuie aan die brand steek.
Die polisiewoordvoerder kolonel Brenda Muridili sê in Jeppestown en Alexandra is 25 mense gisteraand in hegtenis geneem nadat hulle glo winkels geplunder het. Sy sê ongeveer 300 mense het die M2 in Jeppestown versper.
Muridili sê in Alexandra is ‘n polisiebeampte raakgeskiet en moes na ‘n hospitaal geneem word. 16 mense is hier in hegtenis geneem weens openbare geweld en is glo ook betrokke by dié skietvoorval. Twee ander polisiebeamptes is ook beseer.
Volgens haar is ‘n waarskuwing ook uitgereik aan mense wat aanhitsende boodskappe op sosiale media versprei. ‘n Kennisgewing doen die rondte waarin ondersteuners van Jacob Zuma aangemoedig word om môre Suid-Afrika tot ‘n sogenaamde stilstand te dwing.
Die betogings het uitgebreek nadat Zuma Woensdagaand in hegtenis geneem is. Hy is tot 15 maande gevangenisstraf gevonnis en is tans in die Estcourt tronk.
Hou Afrikaans op die lug
