15 Desember 2022
Die voorsitter van die DA se federale raad, Helen Zille, dagvaar die speaker van die Johannesburg se metroraad, Colleen Makhubele vir twee-honderd-duisend rand.
Dit volg nadat Makhubele – wat ‘n lid van COPE is – in ‘n koerantberig na Zille as ‘n arrogante bul verwys het.
Volgens die besonderhede van die pleitstukke wat by die hooggeregshof in Johannesburg ingedien is, het daar op die 4e Oktober ‘n berig in The Star verskyn waarvan die opskrif gelui het: “Makhubele calls Zille an arrogant bull from Cape Town.“
Die betrokke berig het gehandel oor die ANC-geleide poging om van die burgemeester, Mpho Phalatse, ontslae te raak.
Daarin is Zille se beweerde inmenging by die bestuur van die Johannesburgse Metroraad – onder die DA – bespreek.
Phalatse is tydens ‘n raadsvergadering ontsetel, maar is later in haar amp herstel nadat sy die geldigheid van die raadsvergadering in die hof betwis het.
