Die presidensie het vandag aangekondig dat die president van Oekraïne, Wolodimir Zelenski na verwagting volgende maand besoek aan Suid-Afrika sal aflê.
Die presidensie se woordvoerder, Vincent Magwenya, sê die besoek is ‘n voortsetting van deurlopende verbintenisse oor ‘n inklusiewe vredesproses tussen Rusland en Oekraïne.
President Cyril Ramaphosa het Zelenski verlede week op ‘n staatsbesoek genooi, ná hewige kritiek op skuiwe deur Rusland en die Verenigde State van Amerika om ‘n einde aan die oorlog te onderhandel deur ‘n proses waarheen nóg Oekraïne nóg sy Europese bondgenote genooi is.
Ramaphosa het op die sosialemediaplatform, X gesê Suid-Afrika bly daartoe verbind om samesprekings tussen Rusland en Oekraïne te ondersteun.
Volgens Ramaphosa het die twee leiers glo ‘n konstruktiewe verbintenis en stem saam oor die dringende behoefte aan ‘n vredesproses wat alle partye betrek.
Zelenski het Ramaphosa bedank vir sy ondersteuning van Oekraïne se soewereiniteit en gebiedsintegriteit en gesê hy hoop dat vrede vanjaar bemiddel kan word.
“Dit is belangrik dat ons lande dieselfde posisie deel: Niks oor Oekraïne sonder Oekraïne nie,” het Zelenski op X gesê.
2 Responses
Hoekom?
Zelensky is nog ‘n diktator, alhoewel Oos-Europese diktator, waarmee die ANC en Ramaphosa assosieër.
Gaan Zelensky ook sy biljoene Vsa dollars in Ramaphosa se rusbanke “was”?