29 November 2022
Geliefdes van die 29-jarige Willem Kruger het vanoggend afskeid van hom geneem op die familie se plaas, Doornpan buite Groblersdal in Limpopo.
Kruger se liggaam is verlede week in die Vaalrivier buite Morgenzon in Mpumalanga gevind nadat hy op 13 November vermis geraak het. Hy het die vorige aand ‘n rampartytjie by die Henbase Lodge bygewoon.
Kruger se liggaam is sowat ‘n week na sy verdwyning in sy bakkie in die rivier gevind.
LEES OOK: OPVOLG: LIGGAAM IN BAKKIE WÉL DIE VAN VERMISTE WILLEM
Sy ma, Stephanie het in ‘n brief in die begrafnisbrief gesê dat Willem byna met geboorte dood is. Sy pa, Tian skryf hy mis sy seun vreeslik, maar sal sy kop optel en aangaan soos wat hy sy kinders geleer het.
Willem se oom, Eben Kruger het namens die familie ‘n huldeblyk gelewer. Hy het aan sy broer gesê dat hy sy seer raak sien, maar dat hy (Tian) baie sterk is. “Against all odds kry jy nuwe krag, want jy weet jy moet vir almal sterk wees.”
LEES OOK: “DANKIE VIR ALMAL SE GEBEDE,” SÊ PA NA WILLEM KRUGER SE LIGGAAM GEVIND IS
“Stephanie, Willem het jou so lief gehad.” Eben sê die respek wat Willem vir vroue gehad het, is omdat hy sy ma so baie gerespekteer het. Aan sy twee sussies Melissa en Danelle het hy gesê dat die familie hulle altyd sal ondersteun.
“Willem jy was ‘n ‘gentle giant’. Jy was ‘n kind, seun, broer, swaer en vriend. Willem Kruger we salute you.”
Na afloop van die diens is wit rose en roosblare voor Willem se foto geplaas as ‘n laaste eerbetoon.
