21 Oktober 2022
Die onderwysdepartement in die Vrystaat sê hy het met skok verneem van ‘n 35-jarige onderwyser, wat na bewering deur ‘n matriekleerling met ‘n mes doodgesteek is.
Die hoof van die departement, dr. Tate Makgoe sê die fisiese wetenskaponderwyser, Matefo Mphosela was gisteraand (20 Oktober) by haar huis in Botshabelo toe die leerling haar glo aangeval het.
Die 21-jarige matrikulant, Simphiwe Matefo is kort na die voorval vasgetrek en sal binnekort in die hof verskyn op ‘n aanklag van moord.
Die rede vir die moord is nog onbekend. Makgoe sê onderwysers en leerlinge is geskok deur die voorval, en meen dit kom op ‘n baie slegte tyd met die matriekeindeksamen wat binnekort begin.
Die skoolhoof, Nameng Sehloho sê Mphosela was een van die hardwerkendste onderwysers in die provinsie. Hy sê die gemiddelde eindeksamen-punt van haar wetenskap-leerlinge was 84,2% verlede jaar.
