31 Julie 2024
Die premier van die Wes-Kaap, Alan Winde het erken dat daar nog baie uitdagings in die provinsie is, maar het onderneem om dit as ‘n provinsie aan te pak en besluite te neem wat in die beste belang van die inwoners is.
Winde het vanoggend die Wes-Kaapse Provinsiale parlement geopen. Hy het veral kommer uitgespreek oor klimaatsverandering en die natuurrampe wat daarmee saam kom.
Verskeie vloede het die provinsie in die afgelope paar maande getref, en daarom het die premier benadruk dat sy regering sekere aspekte sal hersien, om die skade aan infrastruktuur en lewens te beperk.
Verder het Winde onderneem om die ekonomie in die Wes-Kaap te groei en om werkskepping te verseker. Hy sê hulle sal ook hard werk om die onderwys- en gesondheidsektore te versterk en te verbeter.
