10 Junie 2022
‘n Werklose vrou van Oudtshoorn in die Wes-Kaap is net meer as R31-miljoen ryker danksy Lotto Plus-1.
Die vrou in haar 50’s het die wenkaartjie by Dahley & Khandaker op die dorp gekoop. Volgens die bestuurder van die Lotery, Ithuba het die vrou R40 se kaartjies gekoop en het haar eie nommers gekies.
Sy het voorheen R150 danksy die Lotto gewen. Volgens haar was sy by die huis en het die wennommers op die internet nagegaan toe sy besef dat sy nou ‘n miljoenêr is. Die betrokke trekking is op 1 Junie gehou.
Die vrou, wat uit vrese vir haar veiligheid anoniem bly, sê sy beplan om die geld verantwoordelik te bestee en wil ook ‘n gedeelte daarvan skenk aan minderbevoorregtes.
Sy sê sy beplan egter nié om haar lewe drasties te verander nie.
