9 Mei 2023
Meer as twee-derdes van Suid-Afrikaners het aangedui dat werkloosheid hulle grootste bekommernis in die land is.
Volgens ‘n internasionale meningsopname wat deur Ipsos onderneem is, staan dit teenoor die meerderheid van die internasionale respondente wat inflasie as hul grootste kommer aangedui het.
Die opname getiteld “Wat maak die wêreld bekommmerd?” het aangedui dat 41% van die wêreld se inwoners glo bekommerd is oor inflasie.
Volgens Ipsos het 69% van Suid-Afrikaners aangedui dat werkloosheid hulle grootste rede tot kommer is. Ipsos meen die plaaslike neiging is nié iets nuuts nie, maar dat daar wel ‘n 5% toename was sedert die vorige peiling – toe dit 64% van die plaaslike deelnemers se grootste kommer was.
Op internasionale vlak is werkloosheid as die vierde grootste kommer aangedui, op 27%. Armoede en sosiale ongelykheid is die tweede grootste bekommernis (32%), misdaad is derde op 30% en laastens bekommer mense hulle wêreldwyd oor korrupsie (27%).
