10 Oktober 2023
Die burgerregtegroep, AfriForum, sê die voorgestelde nuwe regulasies rakende watergebruik vir ontspanningsdoeleindes en gepaardgaande waterhulpbronbestuursplanne – wat onlangs deur die departement van water en sanitasie voorgelê is – is teruggetrek.
AfriForum sê hy het sterk kapsie daarteen gemaak aangesien dit nie net ontspanningswatergebruikers soos hengelaars, boot- en seiljagvaarders, toerisme-operateurs en oewer-grondeienaars se gevestigde regte sou vertrap nie, maar ook sou neerkom op ’n growwe oorskryding van regeringsmag.
Volgens AfriForum se adviseur vir omgewingsake, Marais de Vaal, het die departement in ’n kort mediaverklaring gesê daar is besluit om die voorgestelde regulasies terug te trek ná behoorlike oorweging van die publiek se kommentaar
De Vaal sê AfriForum sal steeds volhou om druk toe te pas om te verhoed dat regte vertrap word.
