20 Januarie 2023
Die afsny van elektrisiteit na Eskom se kantoor in Empangeni – aan die KwaZulu-Natalse Noordkus – weens ‘n agterstallige rekening, het dié onderneming onkant gevang.
Eskom het vanoggend gesê die algemene bestuurder, Agnes Mlambo, het eers van die agterstallige rekening verneem enkele ure voordat die uMhlathuze-munisipaliteit die kragtoevoer gister onderbreek het.
Sy sê sy is geskok hieroor aangesien sy self die betaling van diensterekeninge bepleit.
Die kragvoorsiener sê voorlopig lyk dit asof daar van Eskom se persele ook ontkoppel is waar die rekeninge nie agterstallig is nie.
Eskom sal vandag met die munisipaliteit in gesprek tree om die rekeninge na te gaan en die agterstallige bedrae te betaal.
