Twee amateur vryduikers wat met vakansie in Spanje was, wat rommel op die seebodem gaan soek het, het op ’n verrassende vonds afgekom.
Luis Lens en César Gimeno het aanvanklik net agt goue muntstukke gevind.
Dit het ’n reeks duike deur die Alicante-universiteit se argeoloë in samewerking met Guardia Civil se duikeenheid en die Javea-raad tot gevolg gehad.
Hulle het 53 Romeinse muntstukke uitgeduik wat uit die laat 4de of vroeg 5de eeu dateer. Die muntstukke het verbasend goed bewaar gebly.
“Dié is een van die grootste versamelings Romeinse goue muntstukke wat nog ooit in Spanje en Europa gevind is,” het Jaime Molina, die hoof van die span onderwaterargeoloë van die universiteit, gesê.
En hoe indrukwekkend dié vonds ook al klink, was dit nie ál waarop die duikers afgekom het nie. Hulle het ook op drie koperspykers afgekom wat argeoloë glo van die kis afkomstig was waarin die skatte geberg is.
“Dis ’n uitmuntende argeologiese en historiese vonds, siende dat die bestudering hiervan vir ons ’n magdom nuwe inligting kan ontsluit om die laaste fase van die val van die Westerse Romeinse Ryk beter te verstaan.”
