5 September 2022
Die polisie op Malipsdrift, in Limpopo, is op soek na ‘n groep gewapende verdagtes nadat vyf vrouens by ‘n lykshuis deur die bende verkrag is.
Volgens die polisie het die groep gisteroggend twee lykshuise op die R37-pad aangeval.
Die verdagtes het ook ‘n werknemer by een van die persele geskiet en nóg ses mense aangeraand.
Die polisiewoordvoerder, brigadier Motlafelo Mojapelo sê die bende van ses mans het twee vroue langs die pad opgelaai, wat op pad was om een se vriend – wat by die lykshuis werksaam is – te besoek.
Hulle het dié lykshuis beroof en vandaar na die tweede lykshuis gegaan waar hulle nóg drie vrouens en ses mans aangeval het.
Die rowers het met die slagoffers se selfone en ‘n bedrag aan kontant op die vlug geslaan.
