30 Mei 2022
“Die Merafong-plaaslike munisipaliteit (Carletonville, Fochville, Wedela) se onvermoë om die sinkgate wat meer gereeld voorkom te rehabiliteer, stel lewens en eiendom in gevaar.”
Só sê die VF Plus se raadslid in die munisipaliteit, Ben van der Berg nadat ‘n vullisverwyderingsvragmotor in ʼn sinkgat in Caledonstraat, Carletonville beland het. Hy sê ʼn klein sinkgat het twee maande gelede ingeval waarna die munisipaliteit die gebied afgesper en ʼn vrag grond 15 meter voor die gat gegooi het om te voorkom dat water daarin vloei.
“Merafong het sy onderneming om die sinkgat te rehabiliteer, nie nagekom nie. Die gat het vergroot waarna die vragmotor daarin beland het,” sê van der Berg.
Hy sê die VF Plus het reeds twee jaar gelede die munisipaliteit gevra om dadelik met die rehabilitasie van sinkgate te begin.
“Die munisipaliteit het ʼn bedrag van R118 miljoen en ʼn verdere R49 miljoen van die Gauteng-provinsie ontvang vir die rehabilitasie van sinkgate in die gebied. Van die sinkgate is egter net met klip opgevul en geen verdere rehabilitasie of opgradering van infrastruktuur het plaasgevind nie.”
