28 Julie 2023
‘n Voormalige Amerikaanse intelligensie-amptenaar het die week aan ‘n kongreskomitee gesê dat die “mensdom nie alleen is nie, en dat die Amerikaanse owerhede bewyse hieroor wegsteek.”
Die lugmagveteraan David Grusch het getuig dat hy absoluut glo dat die Amerikaanse regering in besit is van “onverklaarde afwykende verskynsels” sowel as oorblyfsels van hul nie-menslike operateurs.
Hy het gesê die Amerikaanse regering weerhou inligting oor sulke verskynsels van sowel die publiek as die kongres, en dat hy onderhoude gevoer het met mense met direkte kennis van nie-mensgemaakte vaartuie.
Hy meen dis belangrik om dié inligting bekend te maak omdat dit in openbare belang is.
Grusch het egter herhaaldelik aan die komitee gesê dat hy nie meer besondehrede oor die bewyse kan verskaf nie, omdat die inligting geklassifiseerd is. Hy het verder aangevoer dat hy nie self foto’s daaroor gesien het nie, maar dat die inligting aan hom bevestig is.
