12 Mei 2023
Die Solidariteit Beweging vra dat die land nie gestraf moet word weens die regering se optrede en nalate nie.
Dit volg in reaksie op die diplomatieke krisis wat uitgebreek het nadat die VSA Suid-Afrika daarvan beskuldig het dat hulle wapens en ammunisie aan die Russe verskaf het.
Die voorsitter van die beweging, Flip Buys, verwys daarna as ‘n ramp en sê dit gaan die land en sy inwoners duur te staan kom.
Hy sê die VSA het reeds streng sanksies teen talle lande – wat teen hulle kant gekies het in die oorlog in Oekraine – en dat die Amerikaanse ambassadeur waarskynlik opdrag van President Joe Biden gekry het om in die openbaar standpunt in te neem.
Buys sê die regering se optrede is onverskoonbaar, omdat dit kom in ‘n tyd wat die land reeds diep in die moeilikheid is.
Hy het ‘n beroep op die VSA gedoen om eerder stappe teen individue in die regering in hulle persoonlike hoedanigheid te doen, as om die land se inwoners te straf.
