13 April 2021
Die Vrystaat se departement van finansies het na bewering R1.4-miljoen bestee aand ‘n byeenkoms waartydens die Vrystaatse begrotingstoespraak in Gariep gelewer is.
Die VF Plus sê in ‘n verklaring dat dié byeenkoms gehou is terwyl dienslewering in die Vrystaat in wese tot stilstand gekom het weens ‘n geweldige geldtekort.
Volgens die VF Plus se provinsiale leier in die Vrystaat, Jan van Niekerk het die LUR vir finansies, Gadija Brown self te kenne gegee dat die Vrystaatse ekonomie in ‘n benarde situasie is.
Van Niekerk sê die party het verlede jaar die Vrystaatse regering uitgedaag om vermaak, spyseniering, vervoer en die huur van lokale en geriewe in die komende jare te besnoei en die krane vir luukshede toe te draai wanneer die pandemie verby is.
Volgens Van Niekerk het die departement na bewering R66 000 aan spyseniering vir die geleentheid bestee terwyl R1,3 miljoen glo aan ‘n maatskappy betaal is vir sogenaamde bemarking van die byeenkoms.
Hy sê die VF Plus is van mening dat die byeenkoms effektiewelik niks moes kos nie, omdat dit in die Vierde Raadsaal in Bloemfontein gehou kon word.
