20 Mei 2022
Die VF Plus het die openbare beskermer (OB) versoek om ondersoek in te stel na die Vrystaatse departement van polisie, paaie en vervoer se gefaalde padprojekte.
Dié departement het hofsake teen konstruksiemaatskappye wat tenders vir padprojekte ontvang het, aanhangig gemaak.
Die VF Plus se lid van die provinsiale wetgewer in die Vrystaat, Armand Cloete, sê dié kontrakteurs was nie in staat om die projekte wat aan hulle toegeken is te voltooi nie en daar is ook gevalle waar paaie wat gebou is, substandaard is.
LEES OOK: “VRYSTAAT ONDERBESTEE R507 MILJOEN, MAAR OORBESTEE AAN SALARISSE,” SÊ VF PLUS
“Die geraamde waarde van hierdie kontrakte beloop sowat R831 miljoen. Die departement poog tans om deur die regsaksie verlore fondse te herwin,” sê Cloete.
Hy sê intussen is die departement genoodsaak om van verkrygingsprosesse af te wyk om nuwe kontrakteurs aan te stel om hierdie mislukte en onvoltooide projekte te voltooi.
“Terwyl die provinsie se paaie totaal vervalle is, is dit onaanvaarbaar dat die departement nie die nodige sorg aan die dag gelê het om tenders toe te ken aan kontrakteurs met bewese rekords in die voltooiing van paaie van goeie gehalte nie,” verduidelik Cloete.
