3 Augustus 2023
‘n 55-jarige vrou van Bothasig in Kaapstad word vandag begrawe nadat sy na bewering deur haar seun vermoor is.
Die 27-jarige Arno Slabbert het gister in die Goodwood landdroshof verskyn nadat hy Vrydag in hegtenis geneem is omdat hy glo sy ma, Margo keelaf gesny het. Haar liggaam is in haar woonstel in die maatskaplike behuisingskompleks, Bothasig Gardens gevind.
‘n Inwoner van die kompleks het aan die media gesê dat hy gereeld met sy ma baklei het, en dat hy haar glo aangerand het.
Die polisiewoordvoerder, sersant Wesley Twigg sê ‘n saak van moord word ondersoek. Die Nasionale Vervolgingsgesag sê die verdagte moet weer op 8 Augustus in die hof verskyn.
