1 Augustus 2023
Suid-Afrikaanse gesondheidsorgwerkers is besig om hulle opsies te oorweeg te midde van angs en onsekerheid oor die Wetsontwerp op Nasionale Gesondheidsversekering, die NGV.
Volgens ‘n Kanadese immigrasiekonsultant, Nicholas Avramis, het sy kantoor vanjaar al nagenoeg 17 000 navrae gekry van Suid-Afrikaanse medici wat moontlik na dié Noord-Amerikaanse land wil verhuis.
Avramis het aan die nuusdiens ENCA gesê dat Kanada gesondheidsorg boaan sy kritieke vaardigheidslyste geplaas het, wat beteken dat aansoekers nie hoef te wag vir ‘n werksaanbod om goedgekeur te word vir immigrasie nie, maar dat hul direk kan aansoek doen.
Volgens Avramis moes aansoekers in die verlede eers ‘n werksaanbod kry, waarna hulle dan vir ‘n werkspermit kan aansoek doen. Hy sê aansoekers moet die nodige werkservaring hê en moet gemaklik in Engels wees.
Hy sê daar was ‘n merkbare oplewing in navrae sedert Januarie vanjaar.
