20 Maart 2024
Die Tshwane-metropolisie (TMPD) het vroeër ‘n voormalige elektriese kontrakteur, verbonde aan die metro in hegtenis geneem nadat hy met ‘n kragmeter gepeuter het, en toe probeer het om ‘n inwoner van Erasmuskloof om te koop.
Die burgemeesterskomiteelid vir finansies, Jacqui Uys sê die inwoner se kragtoevoer moes herstel word nadat hy sy uitstaande skuld afbetaal het.
Die voormalige kontrakteur het die inwoner gekontak en ingelig dat “die meter nooit by die metro geregistreer is nie, maar dat hy die proses sal omseil sodat die verbinding nie deur die metro herstel hoef te word nie.” Volgens Uys het hy egter gesê dat hy dit vir R8000 sal doen.
Sy sê die inwoner het onraad vermoed en die TMPD is ontbied. ‘n Saak is by die Brooklyn polisiekantoor aanhangig gemaak, vir ondermeer korrupsie.
