30 Oktober 2024
Die departement van binnelandse sake sê Chidimma Adetshina en haar ma se Suid-Afrikaanse identiteitsdokumente en paspoorte sal teruggetrek word nadat hulle versuim het om voorleggings aan die departement te doen oor waarom dit nie moet gebeur nie.
Intussen het die Valke ook aangedui dat sy ondersoek na bedrog en identiteitsdiefstal afgehandel is – en dat die aangeleentheid na die Nasionale Vervolgingsgesag verwys is vir ‘n besluit oor vervolging.
Adetshina se deelname aan die Mej Suid-Afrika skoonheidskompetisie het omstredenheid ontketen toe haar Suid-Afrikaanse burgerskap bevraagteken is.
Sy het in Augustus aan die kompetisie onttrek nadat die departement aangekondig het dat hy prima facie-bewyse gevind het wat daarop dui dat haar ma moontlik bedrog en identiteitsdiefstal gepleeg het.
Sy het daarna aan die Miss Universe Nigeria-kompetisie deelgeneem en dié titel gewen.
