23 November 2023
Dit wil in hierdie stadium voorkom of daar waarskynlik nie vanjaar ‘n inenting teen die H7-variant – wat vir die huidige voëlgriep-uitbreking verantwoordelik is – in Suid-Afrika beskikbaar sal wees nie.
Die departement van landbou, grondhervorming en landelike ontwikkeling het die aansoek vir goedkeuring van ‘n inenting afgekeur.
Volgens die departement se woordvoerder, Reggie Ngcobo is dit glo gedoen, omdat daar nie genoeg bewyse was, dat dit werk nie.
Dít terwyl daar glo slegs een maatskappy is wat ‘n aansoek ingedien het, terwyl dié maatskappy nie die nodige dokumente kon verskaf wat die registrateur benodig het nie.
Die voorsitter van die Suid-Afrikaanse Pluimveevereniging, Izaak Breitenbach sê intussen daar is wel ‘n plaaslike maatskappy wat besig is om ‘n inenting teen die variant te vervaardig.
Dié inenting word egter op die oomblik getoets en sal eers teen Januarie gereed wees om aan die departement voor te lê.
